دكتور محمد عصمت
استشاري جراحات الفتق وعضلات البطن

"الموضوع بدأ من زمان لما كنت جراح صغير لسه بابتدي اول خطوات في مهنة الجراحة

 بدأت الاحظ ان المرضي اللي بيجولنا بجراحة الفتاق مش بياخدوا الخدمة المطلوبة زي باقي المرضى ، يمكن السبب في كده ان

معظمهم مش بيكون عنده الم واضح او حاجة تستدعي جراحة عاجلة بسرعة ولا المشكلة اللي عندهم ورم مثلا فاخيفين ينتشر.

 

 علشان كده كان مريض الفتاق بياخذ اقل اهتمام في القسم وكان بيعمل عمليات الفتاق اي حد من اصغر دكتور لاكبر دكتور في القسم، يمكن علشان كان في الوقت ده ما كانش في تقنيات كتير متاحة زي دلوقتي وكانت الطرق المعروفة بسيطة واي جراح بيعملها بدون معاناة.

​

النتيجة كانت ان نسبة المرضى اللي بيرجعلهم الفتاق كبيرة جدا وان جودة العملية ومشاكلها كتيرة جدا.

​

النتيجة كانت ان مرضي كتير بيخافوا يعملوا العملية من المشاكل اللي بيشوفوها في قرايبهم

النتيجة ان مرضي بنشوفهم عاجزين بمعني الكلمة، زي المرضى اللي عايشين بفتاق عملاق مخلي حياته كلها جحيم 

​

بدات ادور وعرفت ان معظم الطرق اللي بنصلح بيها الفتاق في مصر والوطن العربي كله عفا عليها الزمان وان في طرق كتير جدا حديثه بتدي نتايج احسن بكتير وبمضاعفات اقل بكتير ، استهواني الموضوع وبدأت ادور واقرأ كتير في الموضوع واتواصلت مع ناس كتير من امريكا وانجلترا والمانيا والهند شغلهم بس جراحات الفتاق مش حاجة تاني ، بيناموا ويصحوا علشان يطوروا في جراحات الفتاق. سافرتلهم وبدأت واحده واحده اتعلم منهم وبدأت انقل الطرق دي لمصر وبدأ يتكون بينا صداقات  ولحد دلوقتي في بينا تواصل دائم و بقي كل يوم حرفيا في جديد في المجال بحاول ان انقله مباشرة علي ارض الواقع في شغلي.

​

عمليات الفتاق بتعتمد علي الجودة، جودة في كل شيء في  طرق الجراحة والتخدير . في اختيار انواع الشبكات. في الحفاظ علي غرف عمليات معقمة بجودة عالية، اي ضلع ينقص من اضلاع الجودة، اي حاجة صغيرة في التفاصيل ممكن تأثر علي النتيجة.

​

واللي حببني اكتر في المجال ان العمليات فيها مجال للابداع  في كل تفصيلة وكان كل مريض بتفصله العملية علي مقاسه بالظبط بتفاصيل مختلفة تماما عن مريض تاني عنده نفس الحالة.

دلوقتي الحمد لله علي ارض الواقع في مصر حالات كانت معاقة بالفتاق زي الناس اللي عندها فتق عملاق واتحسنوا ورجعوا يمارسوا حياتهم طبيعي 
حالات كتير عالجتها بفتاق رجع اكتر من ٣ مرات و ٤ مرات و ٥ مرات والحمد لله اتخلصوا من مشكلة كانت مؤرقاهم وتاعباهم.

​

مش بس الفتاق ، مجال الجراحة ده عموما جديد في مصر والوطن العربي لأول مره واسمه (Abdominal core surgery) يعني جراحة عضلات المركز وده بيشمل جراحات الفتاق ومشاكل عضلات البطن واورام جدار البطن والآلام المزمنة لجدار البطن ومشاكل السرة وصعوبة اغلاق جدار البطن ومشاكل الكولوستومي.

يمكن كلها امراض متفرقة بين التخصصات نظرا لان التخصص كان مش موجود قبل كده. لكن بفضل الله دلوقتي بقينا علي خريطة العالم في المجال وان شاء الله خلال سنوات بسيطة هانكون بننافس بقوة ونمثل العالم العربي كله.
 
الشغف بالمجال ده بيخليني دائما ادور علي الاحسن لمريضي سواء في مصر او الوطن العربي، والحمد لله قدرت احط اساس قوي لجراحات الفتاق وعضلات البطن في الوطن العربي اتمنى اني اقدر استمر في ده وانقله لجيل من الجراحين الجدد في مصر والمنطقة ".